Segir nýjan kjarasamning bæta jafnvægi vinnu og einkalífs

Tor Arne Berg, forstjóri Alcoa Fjarðaáls, kveðst ánægður með að nýr kjarasamningur hafi í dag verið undirritaður milli Fjarðaáls og AFLs Starfsgreinafélags og Rafiðnaðarsambands Íslands. Hann segir samninginn fela í sér mikla kjarabót fyrir starfsfólk álversins, auk þess sem hann bæti jafnvægi milli vinnu og einkalífs, sem sé mikilvægt fyrir fjölbreyttan vinnustað. Hér má lesa umfjöllun um málið í Austurfrétt. 

Kjarasamningarnir hafa verið lausir frá 1. mars í fyrra en samningurinn gildir afturvirkt frá þeim degi til þriggja ára. Helstu breytingarnar í honum er stytting vinnutíma og hærri laun, hvort tveggja í samræmi við lífskjarasamninginn og aðra samninga í íslenskum álverum.

Samningurinn var undirritaður í húsakynnum Fjarðaáls eftir hádegi í dag. Ríkissáttasemjari hefur leitt viðræðurnar eftir áramót en þær hófust síðasta vor.

Tor Arne segir að þótt samningaferlið hafi verið langt, meðal annars út af Covid-19 faraldrinum, þá hafi samskipti við verkalýðsfélagin góð og aðkoma ríkissáttasemjara hjálpað til við að ná niðurstöðu.

Samningurinn var sendur starfsfólki í gær og hann verður kynntur nánar áður en greidd verða um hann atkvæði. Því ferli lýkur í mánuðinum.